Әнәс (р.а.) Алла елшісінің (с.а.у.) бірде өзіне не дегенін былай айтып берген екен: «Әнәсжан! Таңертең және кешке қарай ешкімге өкпе мен кегің жоқ екенін өзіңе іштей айтып отыр. Шамаң келгенше осылай ет. Әнәсжан! Бұлай жасау менің сүннетім. Егер кімде-кім менің сүннетімді орындайтын болса, ол мені шын жүректен жақсы көргені. Ал мені кім жақсы көрсе, жәннатта менімен бірге болады».

Өмірде екі нәрсені ұмытпа:  Алланы және өлімді!  Екі нәрсені ұмыт:  Жасаған жақсылығың мен көрген жамандығыңды!  Лұқпан Хәкім

Әбу Саидтың риуаят етуінше, ардақты Мұхаммед пайғамбарымыз (с.а.у.) былай дейді: –       Егер кімде-кім адал ас жеп, сүннет амалдарын жасап отырса және өзге адамдар одан келер қауіп жоқ деп сенсе, бұндай кісі жәннатқа барады. Мұны естіген бір сахаба:             – Уа, Расулалла, қазір ел ішінде мұндай кісілер аз емес сияқты? – дейді. Сонда Пайғамбарымыз (с.а.у.):   – Бұл өзі мен өмірден озғаннан кейін де бола беретін жағдай, – деп түсіндіреді. 

Алла тағала бірде пайғамбарына былай деген екен: «Әй, Мұса! Саған мал берілсе, есебін ойла, Дүние берілсе, өлімді еске ал. Қиыншылыққа душар болсаң, дұға ет, Асқа отырсаң, аштарды ойла, Бір күнәға ниет етсең, тозақты ойла, Ауру болсаң, садақа бер, дәрі жаса, Бай болсаң, халқыңды да байыт!»

Әбу Умама былай деп риуаят етеді: «Бір күні сахаба Ибн Омар (р.а.) жаңа киім алды. Артынша былай деп дұға етті: «Әуретімді жабатын әрі әдемі етіп көрсететін киім сыйлағаны үшін Аллаға шүкір!» Осылай дұға еткеннен кейін: «Мен Расулалладан (с.а.у.) үнемі мынаны еститінмін: «Егер кімде-кім жаңа киім алса, осылай деп дұға етсін. Сонда ол адам өлсе де, сау кезінде де Алланың қамқорлығында болады» деді.

Имам Ғазали әрбір жас балаға үйрету керек тамақ әдебі жайлы мынаны айтқан екен:            1. Асты жемей тұрып алдымен «бісміллә» деп айту және оң қолымен жеу;  2. Өз алдынан жеу;  3. Үлкен кісілерден бұрын тамаққа ауыз салмау;  4. Асқа және тамақ жеп отырған кісілерге көзін тігіп қарамау;  5. Асығып жемеу;  6. Асты асықпай, жеткілікті шайнау;  7. Асты кесек-кесек етіп үсті-үстіне ауызға тоғытпау;  8. Асты киімі мен үстіне тигізбеу.

Әбу Усайд Мәлік ибн Рабая әс-Саидидың риуаяты бойынша бір кісі келіп:             – Уа, Расулалла, әке-шешем өмірден озды. Әлі де ол кісілерге жақсылық жасауыма мүмкіндік бар ма? Мен ол кісілерге қандай жақсылық жасай аламын? – деп сұрады. Сонда Пайғамбарымыз (с.а.у.):             – Иә, бар, – деп, оның мәнісін былайша тарқатты:             1. Ол кісілерге дұға тілеу. Жаратушы иеден күнәларына кешірім...

Ұлық имам Әбу Ханифа шәкірті Әбу Юсуфқа мынандай өсиет айтқан екен: «Ұстазың мен өзіңе білім беруші кісілерге Алладан кешірім тіле, Құран оқуды тоқтатпа, қабірлерді және қасиетті орындарды мейлінше жиі зиярат ет».

Әйгілі сахабалардың бірі Ибн Аббас (р.а.) ілім әдебі жайлы мынаны айтқан екен: «Адамдарға аптада бір рет хадис үйрет. Бұл жеткілікті болмаса, екі рет үйрет. Одан да көп үйреткің келсе, үш рет үйрет. Бірақ есіңде болсын, халықты ешқашан Құраннан алыстатпа. Жұрт өзді-өзді сөйлесіп жатқанда араларына килігіп, әңгімелерін бөліп, өз ойыңды тықпалап, оларды мезі етпе. Біреу сөйлеп жатқанда үнсіздікпен тыңдай біл. Егер олардың өзі саған сөйле десе, сонда ғана айтарыңды айт».